Өөртөө гутраад

Хөвсөн, хийссэн амьдрал
Хий хоосон инээмсэглэлүүд
Дүр эсгэлтүүд
Хичнээн танил вэ
Хичнээн ойрхон бэ

Эндэхийн биш эндэхийн амьдралд дасах гэж
Хичнээн жил сүнс минь тийчлэнэ вэ
Өөрийгөө өөр гэж харсаар
Хичээн удаа өөрийгөө хуурна вэ

Эндэхийн гэдгээ хүлээн зөвшөөрөлгүй
Нүдээ анин, чихээ дарж
Бүгдээс зугатах ч бүгдийн дунд байх гэж
Хичнээн их хүсдэгээ
Өөрөө өөрөөсөө нууж
Хэдий удаан тэсэх вэ

Бүгдээр хайрлуулах гэж
Тэдний хайрыг төгс байлгах гэж
Өөрөө өөрийгөө хэдэнтээ сийчнэ вэ

Өвдөлтүүд

Үргэлж дутуу амьсгалж
Нүдээ аниад сэрэхэд юу ч байхгүйгээс айж
Санаа алдалт, бүгдийг тэвчихээс
Бас эцэс төгсгөлгүй хүлээлтээс
Үнэндээ залхаж байна
Юунд, тэгтлээ, тийм их
Намайг зовоох
Намайг хүлээлгэх
Өдөр бүр өвдөлттэй сэрэх
Хэзээ ч бүрэн эдгэдэггүй шарх
Чамайг харах бүрд хөндүүрлэж
Өрцний цаанаас тийчлэн хашгирна
Миний чамд өгсөн өвдөлтүүд
Хүсээгүй байхад, чиний өвдөлтүүд
Олон сарын, бүүр зүрхний гүнд байх юм

Бүх зүйлд намайг уучлаарай

Маш их зүйлийг тэвчиж ирсэн
Түүнийхээ адил маш ихээр чамайг зовоосон
Үргэлж чиний хүссэнээр байх гэж хичээхдээ
Тэр хэрээр чамайг тавгүйтүүлдэг байсан
Чамд хэрэгтэй хүн байх гэсэн үйлдэл бүрийн араас
Чамаас хэцүү зүйл шаарддаг байсан
Чамайг хайрлаж байна гэхдээ
Чамайг бүх зүйлээс чинь тусгаарласан
Чамайг харамласандаа
Өөрийгөө би өчнөөн удаа өөр хүн болж байгаагаа харсан
Ингээд харсан, миний чамд өгсөн зүйлээс
Чамайг зовоосон нь их юм

Чамд би юу өгсөн бэ?

Чамайг явуулж, эсхүл
Би өөрөө явж
Чи намайг явуулж, эсхүл
Чи өөрөө явж
Энэ бүхэн дуусах ч
Нүдээ аниад, хэсэг яг ингээд
Шүхрэн доороо борооноос хоргодмоор байна

Гэхдээ,
Чамайг хүссэн шигээ хайрлаж
Чамд бодсон шигээ хэрэгтэй байж
Чамайг чиний хүссэн шиг тайван байлгаж
Чамайг өөрийгөө хайрладаг шигээ хайрлаж чадсан болов уу

"Хайртай" гэдэг үг

Хайртай гэж хэлэхгүй байсан ч, эсхүл
Хэзээ ч хайртай болохгүй байсан ч
Чи миний дэргэд үлдсэн цаг хугацаа
Намайг үлдээч гэсэн чиний харц
Надтай хамт өнгөрүүлсэн дурсамжууд
Хэний ч мэдэхгүй газарлуу
Хичнээн олон удаа очсон аяллууд
Нүдээ аниад үнссэн чиний үнсэлтүүд
Чангаас чанга тэвэрсэн тэврэлтүүд
Надад зориулж зурсан  зургууд
Миний төлөө дуулсан аялгуунууд
Хамтдаа амьсгаа дарах хүлээсэн мөчүүд
Хамтдаа инээгээд алхсан гудамжнууд
Хамтдаа бүтээсэн дурсамжууд, сэтгэл хөдлөлүүд
"Хайртай" гэдэг үгийг ч орлохоор тийм их агууламжтай

Чамайг хайрлах мянган шалтгаан бий

Чамайг хайрлахад энэ нас минь ч багадаж
Чамайг хайрлахад энэ бие минь ч хүрэхгүй мэт
Чамайг ширтээд суухад хэдэн зуун ч хангалтгүй санагдаж
Чамайг энэ чигээр нь үүрд дэргэдээ үлдээхсэн



Чамайг хайрладаг миний хайрын тухай
Огт танихыг, мэдэхийг, ойлгохыг хүсдэггүй ч
Чамайг хайрлах мянган шалтгааныг
Чамд би өдөр бүр шивнэнэ

Чиний дэргэдээс холдож чадахгүй нь

Чиний тэр их инээд
Чиний тэр их хайр
Чамаас цацрах гэрэл
Намайг барьц алдуулдаг харц

Чамд хайртай гэж хэзээ ч хэлэхгүйг минь
Чамайг санааад үхэх гэж байна гэж хэзээ ч бичихгүйг минь
Мэддэгтээ чи намайг хайрлаж
Намайг аргадаж, зүгээр тэвэрдэг байсан

Өчнөөн уйлсан нулимсыг чинь
Бүгдийг төлж дуустлаа
Чиний дэргэд үлдэнэ

Ид шид

Нууран дахь шувууд

Муурны эзэн

Ойн дундах байшин

Чиний гитар

Гарны чинь судас
Миний дуртай үнэр
Миний оролдох дуртай үс
Миний атгах дуртай гар
Миний үнсэх дуртай уруул

Үлгэрийг одоо жинхнээсээ эхлүүлж
Гарт чинь би ид шид үлдээе

Хайрыг үзэн ядалт болгож үзэв

Би дуртай
Би түүний сэтгэл татам инээмсэглэлд дуртай
Би түүний хичнээн загварлаг харагддаг үсэнд дуртай
Би түүний баруун гаран дээрх чинжүүний хэлбэртэй сорвинд дуртай
Би түүний цээжний цаана нуугддаг тэр зөөлөн нууц хүнд нь дуртай

Би дургүй
Би түүний барагтаа инээддэггүй асар хүйтэн харцанд дургүй
Би түүний хэзээ ч дулаанаар цохилдоггүй зүрхний цохилтонд дургүй
Би түүний уул шиг овоолсон урагшаа унжихаараа үнэхээр муухай харагддаг үсэнд дургүй
Би түүний эв хавгүй шаамийсан эрүүнд дургүй

(500 DAYS OF SUMMER-c сэдэвлэв)

Далавчаа гэмтээхээ шахаж

Чамаар,
Чамаас болж
Дүүлэн нисэх
Далавчаа гэмтээх шахаж
Аз болж,
Эртхэн
Хөндүүртэйгээ эвлэрч
Буцаж ирлээ
Чамайг ч ойлгож
Өөрийгөө ч хайрлалаа
Бүх зүйл цаг хугацаандаа
Хамгийн сайхан байсныг
Чамд үнэхээр л дурласнаа
Үзэсгэлэнтэйгээр дурсъя

Гашуудлын симфони

Бүх зүйл ингээд дууслаа
Чиний нүдний далайн давалгаа
Миний инээдэнд тэссэнгүй

Цэцгэнд далавч ургаад

Чиний зүгээс цэцэгсийн үнэр
Хичнээн сэтгэл татам
Шувууны далавчинд цэцэг ургаж
Цэцэгний дэлбээнд далавч ургана
Цэцэг, шувуу хамт ниснэ
Хамтдаа
Энэ хэр их удахыг
Энэ хэр их өвтгөхийг
Энэ хэр их жаргалтай байлгахыг
Мэдэхгүй ч
Хэсэгтээ ингээд, нүдээ аниад
Чиний дэргэд баймаар байна

Үхтлээ айсандаа

Хайрлаж ч болдоггүй, санаж ч болдоггүй
Чамайг миний дэргэж байгаасаа гэж хэлж ч болдоггүй
Би ер нь яаж ч болдоггүй
Хүссэн ч чаддаггүй

Харин чи,
Өдөр бүр чамд хайртай гэнэ
Атаархмаар хөнгөн
Чамайг санаад байна гэнэ
Санаа зовмоор нүүрэмгий
Намайг хайрла гэнэ
Чадахгүй байгааг минь ч мэдэхгүй
Би үнсүүлмээр байна гэнэ
Нүүр минь халуу оргитол

Чамд татагдаад
Чамгүйгээр амьдарч чадахаа байчихвал
Чи яах вэ?
Нисээд явчих уу, далавчтай юм чинь
Чиний үнэрийг үнэрлэхгүйгээр
Чиний арьсыг мэдрэхгүйгээр
Амьсгалж ч чадахгүй болчихвол
Чи яах вэ?
Тэр үед чи
Тачигнатал инээгээд
Намайг шоолох байх
Чамайг ийм болохоор
Би хайрлахаас үхтлээ айж байна

Хоромхон зуур тэнгэр цэлмэх

Нуурын эргээр зугаална
Өөрөө өөрөөсөө цөхөрнө
Чамайг хайрлахаас бас залхана
Эргээд л зугаалж эхэлнэ
Өөрөө өөрийгөө хайрлана
Чамайг санана

Тэр нуур нэг өдөр нам гүм
Бүр хайр хүрэм дулаахан
Нууранд миний хайртай муурны ах дүүс
Хамт бүжиглээч гэж урина

Зарим өдөр шуурга шуурч
Аймшигтай хүйтэн болно
Нууранд миний дүрс ч харагдахгүй
Би өөрөө төөрнө

Эргэж буцах, чамайг хүлээх
Эцэс гэж байгүй тойрог шиг
Хэзээ ч хүссэн шиг минь биш
Хэзээ ч би бас өөрийнхөөрөө биш

Дундуур ч биш дүүрэн ч биш сэтгэлээр
Дэргэд чинь хэр удаан би тэсэх вэ
Дуртай, дургүйгээ хэлэхгүйгээр
Чи хэр удаан чимээгүй байх вэ

Үүл хуралдаж, хүйтэн бороо орно
Чамайг байхгүйд даарна
Чи харин ганцаарддагийг минь ч мэдэхгүй
Хүйтэн инээмсэглэнэ

Нар гарна, хоромхон төдийд
Цэлмээд ирнэ
Дулаахан инээмсэглэхэд чинь

Атгаг хийгээд хаврын их эморлын тухай

Бүх зүйл утгагүй санагдаж, бүх зүйлд уур хүрдэг улирал айсуй. Зэрэгцээд толгой ч бас хагарах нь.
Хаанаас ирээд, хаана хүрээд, юуг даван туулаад дуусах юм байгаа юм.
Дутуугийн синдром биш илүүгийн синдром сэтгэцийн гэмтэл бололтой. Хайр, халамж, байгаа бүхэндээ сэтгэл нь хэзээ ч ханахгүй байсаар, нэг өдөр түүндээ живээд, үхэх байх.



Яагаад ингэж их хүнээс хамааралтай байдаг юм.

Боль, орхи, чи хамгийн чухал биш, үүнд битгий анхаарлаа хандуул, сулал....
Хичнээн их тийм зүйл сонсов.
Хичнээн бодоод ч яагаад болихгүй байгааг мэдэхгүй байна

Зураачийн хайртай эмэгтэй

Гунигтай тэ,
Чи минийх биш байх
Энэ уруул, энэ үнэр
Минийх биш байх
Бороонд хамт алхахад
Чамайг дураараа тэвэрч чадахгүй байх
Хэтэрхий гунигтай юм

Яагаад бүх мэдрэмжээ нуудаг гээч?
Чи минийх биш болохоор

Юдит

Өглөөгүүр замын түгжрэлд Юдитын тухай уншиж явлаа. Бүх амьдралынхаа туршид хэрхэн амиа егүүтгэх талаар л бодож ирсэн хүний хувьд үнэхээр л нэвтэрхий толь, гарын авлага байлаа.
Энэ зуур мууртай залуугийн тухай бодов. Юу ч ярьдаггүй хүнтэй хамт байх ямар хэцүү. Тэр юу ч ярьдаггүй, бас сонсмоор ч үгүй байдаг байх. Тэгэхээр нь би ч бас ярихаа байчихсан. Гэхдээ энэ миний мөн чанар биш шүү дээ.
Хоёр хүн таг дуугай урдах кофегоо л уугаад суух бараг л там. Яахав заримдаа ээлжлээд юмуу зэрэг утсаа оролдоно. Ямар утгатай хамт байгааг чөтгөр л мэдэх байх.

Урлагийн тухай, киноны тухай, номны тухай, чиний тухай бодсоор, ярьсаар хамаг амьдрал минь дуусаж байх шиг. Ядаж л Юдит шиг утга учиртайхан үхэх юмсан.

Зарим зүйлс, ер нь ихэнхи зүйлс хагарсан л бол буцаж хэзээ ч хуучин хэвэндээ ордоггүй аж.
Нүүр, толгойн бүх хэсэгт халуу шатна, харин хурууны үзүүр, хөлийн үзүүрт асар хүйтэн цус урсаж байгаа мэт мэдрэгдэж байна. Толгой эргээд, хаа нэгтэйгээр ямар нэг хүчтэй зүйл урсан гарч ирээд намайг авч явахыг хүлээх шиг.

Мууртай залуу юу ч ярихгүй байх нь дээр ч юм шиг.

Чиний инээхийг харах

Чиний инээд буцаж ирэхэд
Цас хайлж, бороо орж, зун болж
Хавар ирдэг

Чи буцаад ирэхэд
Нар үүлээ хөөж, төдхөн гараад ирдэг
Цэцэгс дэлгэрч, солонго татдаг
Чамайг инээхэд

Чиний инээмсэглэлийн төлөө
Сул дорой болсон ч
Илүү болгоомжтой байсан ч
Чимээ гаргалгүйгээр
Амьсгалж сурсан ч

Догдлол бүхнээ
Хүсэл бүхнээ
Чамд харагдаж, мэдрэгдэхгүйгээр
Нуугаад, далд хийчихээд
Чиний дэргэд үлдэж байна

Цэгцрэх цаг үе

Гэмтэж, бэртэх дуртайдаа
Зовж, шаналах дуртайдаа
Энэ нь л намайг тодорхойлдог болохоор
Тэнэг гэж харагдсан ч
Энэ л би болохоор
Яг энэ чигээрээ л үлдэнэ

Гарт мэдрэгдэх дулаан
Цээжний цаана цохилох эрчим
Чиний дэргэд байсан, байгаа, байх
Тэр их сэтгэл
Чиний хажууд чимээгүй
Чамайг инээмсэглэхийг харж
Үүрд ингээд, үхэхэд ч бэлэн

Чи "чи" биш байгааг харах

Үл хүндэтгэх бүрт чинь

Чамайг хэдэнтэй үзэн ядавч

Чи чи биш байгааг харах

Тийм их өвдөлттэйгээр 

Өөрийгөө зовоох нь

Хэцүү биш үү

Тийм хэцүү юу, би

Тийм их халширмаар
Тийм их хэцүү юу
Удаан хамт байхад
Тийм их төвөгтэй хүн үү
Надтай хамт байхад хэцүү болохоор
Чи явлаа ч гэж хэлж чадахгүй
Түр явлаа гэж байгаа юу, эсвэл
Надтай хамт байхдаа дуртай эсэхээ мэдэх гэж
Түр явж байгаа юу

Хүлээж бай гэхээр хүлээгээд
Ирэхэд чинь байж байх

Чамайг хайрлах

Хэт их төсөөллөөс буух мэдрэмж
Хэт их хайраас шархлах мэдрэмж
Хайрлаад байхад чи сонсогдохгүй мэдрэмж
Чамд үхтлээ гомдох мэдрэмж
Чиний хэзээ ч мэдэхгүй, бас ойлгохгүй мэдрэмжүүд

Чиний зүгийн салхинаас чиний үнэр алга
Өчүүхэн ч хэлтэрхий алга

Чамайг хайрлана гэдэг
Өдөр бүр шарлах
Юу ч хүсэхгүй байх
Юуг ч хүлээхгүй байх
Зөвхөн би хайрлах
Чи хэзээ ч инээхгүй байх юм

Маш хүнд байна
Чамайг хайрлах
Хатуурхах бүрд чинь
Нүдээ аниад
Хүлээх

Чиний нүдний гүнзгий ёроолд
Би хэтэрхий гүн шигдчихэж
Би чамайг туулж барахгүй бололтой

Чамайг үхэлд бэлдээд

Гэрэл, тайвшрал хоёр дэргэд чинь чимээгүй сууна
Чи огтхон ч харахгүй, нүдээ ч анивчихгүй юм
Үхэх юм гэнэ
Маргааш гэж байхгүй гэнэ
Чиний үхэлд бид хамтдаа бэлдэж
Сүүлчийн амьсгалыг чинь
Утга уянгатай өнгөрөөх гэж
Хайр, чин сэтгэл, зүрхний цохилт
Чиний дэргэд чимээгүй л сууна
Чи бас л харсангүй
Ганцаараа, юуг ч мэдрэлгүй
Хангалттай их инээлгүй
Тийм их сэтгэлийн ачаатай
Явахыг чинь харах
Өр өвтгөм юм

Чамаас би юу хүсэхээ мэдэхгүй байна

Дотор хөндүүрлээд
Чамайг санаад

Гишгэл алдаад, чамайг гэмтээчих гээд
Надад нэг л хэцүү байна

Чамайг чимээгүй ширтээд
Чиний дэргэд баймаар байна

Чамаас юу ч хүсэхгүйгээр
Чамайг энэ чигээр чинь хайрламаар байна

Хар нүхрүү уначихаад

Хэтэрхий давчдам, бүүр дэндүү саарал

Агаар ч үгүй, амьсгалахад ч бэрх

Бүх зүйл тухгүй байна

Хайр, халуун дулаан үгс, чиний инээмсэглэл хүртэл

Би хүртэх эрхгүй, хий хоосон зүйл мэт санагдаж байна

Надаас ямар нэг зүйл хүссэн чиний харц

Намайг бүүр ихээр тухгүй болгож байна

Чи хичнээн үзэсгэлэнтэйг

Хичнээн сэтгэл татам гэдгийг

Би чамд хэзээ ч хэлэхгүй байсан ч 

Чи үргэлж хамгийн тод гэрэл байсаар байна

Энэ нүхнээс намайг гаргаж чадахгүйдээ

Хамт байх гэж хичээх чинь хүртэл

Намайг улам л тухгүй болгож байна

Би өөрөө л гармаар байна

Эсвэл эндээ үүрд үлдмээр байна 

Жаахан, багахан хугацаанд

Би явчихаад ирье

Мэлхийн ордны хайр татам эмэгтэйдээ

Тэр нэг тийм гэж тодорхойлогдохгүй үзэсгэлэнтэй,

Эрэгтэй хүнд эмэгтэй хүн ингэж л харагдвал үзэсгэлэнтэй байх гэмээр үзэсгэлэнтэй

Би сайн мэдэхгүй юм, түүнийг ширтээд суухад би өөрийгөө хайртай эмэгтэйгээ харж байгаа эрэгтэйг дүрд орсон мэт санагддаг.

Юуг ч юм яриад суухад яагаад ч юм нүдэнд чинь нулимс цийлэгнэхийг нь
Хорвоогийн харцуулыг хуйлруулаад үсээ шидлэхийг нь
Хачин гэмээр дэндүү хачин занг нь
Үнэнтэйгээ нүүр тул гэж хэлэхийг нь
Бүгдийг нь хайрламаар...

Муурны эзний хүсэл

Юу ч хүсэхгүй, мэдрэхгүй, оршихгүй.
Энэ биеийн жаргал байж болох, гэвч сэтгэл, оюун санаа нэг насных биш бол яаана.
Хэдэн мах, яснаас салсан ч хаа сайгүй хэрэн хэсүүчилж, үзэх үзэхгүй, дургүйгээ харвал яаана.
Энэ саарал хорвоогоос салах тийм ч амар биш байх
Үдүүлж зовохоор
Үдэж гунихарсан нь амар мэт...

By 

Хайрламаар

Хайр ундраад

Чамайг харахаар

Чиний доторх гоо үзэсгэлэнг

Чиний доторх далайн давалгааг

Чиний доторх уулсыг, үүлсийг

Чиний доторх борооны дуслуудыг

Би бүгдийг нь харсан...

Тэр хүн ингэж хэлсэн

Тэр хүн ингэж хэлсэн:

Би хүнд чин сэтгэлээсээ хандаж чаддаггүй
Бүүр хэнд ч 

Бодох бүрт, санах бүрт зүрх зүсэм юм энэ үгс.

Чамтай хамт байхгүй өдрүүд
Байх байсан ч байгаагүй өдрүүд
Чиний болгоомжилсон, хичээгээгүй өдрүүд
Намайг зүрхнийхээ ойр мэдрээгүй өдрүүд
Цаг хугацаанд найдсан өдрүүд, тэр өдрүүд
Хэр удаан үргэжлэх вэ
Хэзээ чи надад зүрхээ гаргаж үзүүлэх вэ

Яавал чи жаргалтай байх вэ

Яавал чи жаргалтай байх вэ
Яавал би чамайг сэтгэл тайван байлгаж чадах вэ
Хамгийн чангаар хашгираал бүх үгээ залгилгүйгээр гаргаад
Бүх бодлоо уйлж байгаад бүгдийг хэлээд
Би явчихмаар байна үүрд
Хамгийн ихээр хувиа хичээгч учраас
Би үсэрлээ

Надад хэн ч байхгүй бол
Явахад хичнээн амар
Амттай хуушуур хийчихээд
Сүүлийн удаа шалаа угаачихаад
Би зүгээр л явлаа
Захиа ч үлдээхгүй
Хэнийг ч буруутгахгүй
Хэнээс ч уучлалт гуйхгүй
Би явлаа
Энэ л хамгийн зөв зам

Дүр эсгэж үхдэл шиг
Алхам бүртээ хутгаар сийчүүлж
Өөрийгөө дотроосоо үхэж байгаагаа
Харсаар байгаад амьдарч чадахгүй нь

Бүх бие минь хөндүүр
Шөнөжин зодуулсан мэт
Алхаж гишгих байтугай амьсгалахад ч бэрх байна
Чи намайг шөнөжин өдөржин тарчлааж
Чиний хажууд амьсгалах, амьд явах хэцүү юм

Би таныг бүтээсэн гэнэ

Би чиний яриаг сонсох дуртай,
Бүүр ямар ч сэдвээр байсан
Хэдэн цагаар ч хамаагүй

Бусдаас өөр өнцгөөс харж ярьдаг. Ухаалаг бас цэгцтэй. Ер нь өөр ертөнц. Энэ амьдралыг алган дээрээ дэлгэж тавьчихаад хажуугаас нь харж байдаг хүн. Магадгүй дээрээс нь ч юмуу. Тэр үед нь би өчүүхэн гэдгээ мэдэрдэг.

Таны үгээр тэжээгдэж, хэдэн өдөр амьдрах нь. Намайг өөр гэдэгт цор ганц итгэдэг хүн болохоор, бүүр чин сэтгэлээсээ намайг хайрлаж, дэргэд минь байдаг болохоор таньд би бүх л насаараа хайртай байх байх. 

Та л хэлсэн болохоор би ухаалаг бас өөр гэж итгэдэг

Та л хэлдэг болохоор би өөрийгөө үзэсгэлэнтэй гэж боддог

Таныг би бүтээсэн байсан ч 

Та намайг бүтээсэн байсан ч 

Энэ бол бурхны бидэнд хайртайг илэрхийлэх бэлэг юм. 

Дулаан тэврэлт

Түүний тэврэлт дулаан юм

Үүрд тэнд үлдмээр

Чамайг тайтгаруулаад

Дэргэд чинь баймаар

Чамайг бүүр ихээр хайрламаар байна

Чамаас би үнэртэж

Надаас чи үнэртэж

Ингээд үүрд мөнх

Гарыг чинь дэрлээд

Сүүлчийн амьсгалаа

Чамд хайртай гээд

Чиний дэргэд үлдээмээр байна